РЦИ-Аланийы культурæйы министр Милдзыхты Руслан архайдта Уæлахизы боны кадæн мадзæлтты

181

РЦИ-Аланийы культурæйы министр Милдзыхты Руслан архайдта Уæлахизы боны кадæн мадзæлтты. 2017-æм азы 8-æм майы бæрнон адæймаг æрымысыд Фыдыбæстæйы Стыр хæсты чи фæмард, уыдоны рухс нæмттæ æмæ дидинджытæ сæвæрдта Намысы Мемориалы.

Культурæйы министрад, традицион культурæ æмæ этнотуризмы республикон центр «Фарн» Театралон фæзы сарæзтой бæрæгбоны концерт. Архайдтой дзы зарæггæнджытæ æмæ кафджытæ. 30-æм скъолайы ахуыргæнинæгтæ лæууыдысты ирон театрмæ бацæуæны, сæ къухты Ирыстоны цæрджытæй Советон Цæдисы хъæбатыртæ чи сси, уыдоны къамтæ, афтæмæй.

Уый фæстæ Тæбæхсæуты Балойы номыл ирон академион театры сарæзтой Уæлахизы боны кадæн кадджын бæрæгбон. Фыдыбæстæйы Стыр хæсты ветерантæн арфæ ракодта РЦИ-Аланийы сæргълæууæг Битарты Вячеслав:

— Сымахмæ гæсгæ мах ахуыр кæнæм цæрын æмæ уæлахиз уæвын. Уадз æмæ Уæлахизы бон æвдисæн уа, мах Фыдыбæстæйы Стыр хæсты архайджытæй бузныг, нæ Райгуырæн бæстæйæ та сæрыстыр кæй ыстæм, уымæн. Йæ хæдбардзинады æмæ сæрибардзинады сæраппонд тох кодтой нæ фыдæлтæ. Йæ сабырдзинады тыххæй фæллой кæнæм мах, — загъта республикæйы разамонæг.

Ветеранты зæрдæтæ барухс кодтой Паддзахадон филармонийы нæлгоймæгты зарæггæнджыты къорд (разамынд ын лæвæрдта Дзанайты Олгæ), камерон хор «Алани» (разамынд ын лæвæрдта Кокойты Агуындæ), кафты ансамблтæ «Чысыл джигит», «Сюрприз» æмæ «Амонд» æмæ культурæйы колледжы фæндырдзæгъдджыты къорд. Хæстон азты зарджытæ акодтой Фидараты Тамарæ, Дзахойты Залинæ, Хадыхъаты Аллæ æмæ Аланæ, Фидараты Дзерассæ, Ольга Фролова, Бекъойты Вано, Сæбанты Валери, сувороваг Къарджиаты Вадим, проект «Синяя птица»-йы архайæг Хуытъиаты Вероникæ, Е. Вахтанговы номыл уырыссаг академион театры актриса Анжелика Тер-Давидянц та бакаст Роберт Рождественскийы «Баллада о зенитчицах». Концерты кæронбæттæн зарæггæнджытæ акодтой зарæг «Уæлахизы бон».

ОСТАВЬТЕ ОТВЕТ

Please enter your comment!
Please enter your name here