Кавказы адæмты культурæ æмæ спорты фестивалы архайджыты æмæ уазджыты зæрдæтæ барухс кæндзысты цымыдисаг программæйæ

77

8 сентябры Дзæуджыхъææуы сарæзтой Кавказы адæмты культурæ æмæ спорты фестивалмæ цæттæ кæныны фарстаты фæдыл æмбырд. Архайдтой дзы Цæгат Ирыстоны культурæйы министр Милдзыхты Руслан, физкультурæ æмæ спорты министры хæстæ æххæстгæнæг Бæройты Хасан, музыкалон æмæ фестивалон программæты федералон дирекци «Росконцерт»-ы сæйраг режиссёр Михаил Высоцкий æмæ æндæр бæрнон кусджытæ.

Куыд загътой, афтæмæй фестиваль гомгæнæн æмæ сæхгæныны кадджын мадзæлттæ, стæй спортивон ерыстæ сараздзысты республикон стадион «Спартачы». Сæ ныхæстæм гæсгæ, фестивалы архайджыты æмæ уазджыты зæрдæтæ барухс кæндзысты цымыдисаг программæйæ. Адæмæн дзы сæ бон фенæны уыдзæн Нарты кадджыты сæйраг хъайтарты.

Уымæй уæлдай ма дзы сараздзысты концерт. Архайдзысты дзы Цæгат Ирыстоны æмæ сыхаг республикæты хуыздæр артисттæ æмæ сфæлдыстадон къордтæ. Аивадуарзджыты зæрдæтæ барухс кæндзæн Сауденджызы флоты кафты æмæ зарды ансамбль дæр.

Фестивалы архайджытæ кæрæдзийы зонгæ кæндзысты сæ адæмы царды уаг æмæ культурæимæ, æвдисдзысты æрмдæсныты куыстытæ, национ уæлæдарæс æмæ хæринæгтæ.

Кавказы адæмты культурæ æмæ спорты фестиваль Ирыстоны сараздзысты фыццаг хатт 30 сентябры æмæ 1-æм октябры. Йæ хæс у фæсивæды *ргом спортмæ раздахын æмæ республикæты *хсæн хæлар ахастдзинæдтæ рапарахат кæнын.

ОСТАВЬТЕ ОТВЕТ

Please enter your comment!
Please enter your name here