Балетмейстерты æмæ кафаг къордты разамонджыты семинар-практикум

153

9 декабры РЦИ-Аланийы Адæмон кафтытты паддзахадон академион ансамбль «Алан»-ы бæстыхайы ацыд балетмейстерты æмæ кафаг къордты разамонджыты республикон семинар-практикум. Сарæзта йæ Традицион культурæ æмæ этнотуризмы республикон центр «Фарн».

Мадзалы архайдта РЦИ-Аланийы культурæйы министр Милдзыхты Руслан.

— Нæ зæрдæйы ис саразын хореографты дæсныйад æмæ ахуырдзинад аттестации чи кæна, ахæм сæрмагонд къамис, кæцы бæрæг кæндзæн сæ профессионалон фæлтæрд, сæ фæллойы рæстæг æмæ æнд. Уымæ гæсгæ хореографтæн  бар уыдзæн сывæллæттимæ кусын, — загъта бæрнон адæймаг.

Ирон уæлæдарæсы национ традицитæ бахъахъхъæды проблемæтыл æрдзырдта Уæрæсейы нывгæнджыты Цæдисы уæнг Цогойты Батраз:

— Ирон традицион дарæсæн ис хъæздыг истории, уый иу кæны ивгъуыд æмæ фидæн. Алы дзаумайæн дæр ис йæхи нысаниуæг, æвдыст дзы цæуы нæ фыдæлты царды уаг. Национ уæлæдарæс аразыны разæй хъæуы лæмбынæгæй иртасын нæ истории æмæ нæ культурæ. Мах нæ национ бынтæ куы не рбæстон кæнæм, уæд нæ истории дæр фесæфдзæн, — бахахх кодта Цогойты Батраз.

Национ хореографи сног кæнын кæй хъæуы æмæ хореографты Ассоциаци саразыны тыххæй йæ ныхас загъта Паддзахадон ансамбль «Алан»-ы разамонæг Тедеты Руслан. Уымæй уæлдæй ныр Цæгат Ирыстоны кафаг къордтæн фæзындзæн фадат ансамбль «Алан»-ы репетиции фенын. Уый тыххæй хъæуы ныффыссын курдиат Тедеты Русланы номыл.

Нырыккон рæстæджы ирон адæмон хореографийы рæзты концепцийыл йæ хъуыдытæ загъта Дзæуджыхъæуы аивадон колледжы классикон кафты ахуыргæнæг Зыгъуытаты Лидия.

Мадзалы йæ ныхас загъта РЦИ-Аланийы Паддзахадон филармонийы адæмон инструментты оркестры разамонæг Ходы Олег дæр.

ОСТАВЬТЕ ОТВЕТ

Please enter your comment!
Please enter your name here