Ног Бæтæхъойыхъæуы байгом ног Культурæйы хæдзар

144

29 декабры уыд нысаниуæгджын бон канд Ног Бæтæхъойы хъæуыггæгтæ нæ, фæлæ æппæт Рахизфарсы районæн дæр.  Рагæй цы æхсызгон хабармæ æнхъæлмæ кастысты, уый сæххæст  – хъæуы кадджын уавæры байгом Культурæйы хæдзар, кæцы ахъаз кæндзæн Ног Бæтæхъойыхъæуы цæрджыты æхсæнадон-культурон райрæзтæн. Артдзæстæн лæвæрд æрцыд сæ кадджын æмхъæуккаг, УФ-йы æмæ РЦИ-Аланийы адæмон артист, Ирон театры зæрингуырд, кинойы артист Уататы Бибойы ном.

Мадзалы архайдтой РЦИ-Аланийы сæргълæууæг Битарты Вячеслав, Цæгат Ирыстоны культурæйы министр Милдзыхты Руслан, Рахизфарсы районы сæргълæууæг Фрайты Сослан,  бынæттон хиунаффæйады администрацийы сæргълæууæг Дзебойты Станислав, дзыллон хабархæссæг фæрæзты минæвæрттæ æмæ бынæттон цæрджытæ.

-Ацы хъæуы ис бирæ курдиатджын æмæ сфæлдыстадон адæм. Ныр сын фæзынд фадат æххæст культурон цардæй цæрын. Культурон  хæдзары уыдзысты æппæт уавæртæ йæ курдиат æмæ хъару чи тырны царды мидæг ауадзын, уыцы хъæуыггæгты æвдæлон рæстæг организации кæнынæн. Артдзæсты уыдзæн алыхуызон культурон мадзæлттæ, концерттæ, равдысттæ, сывæллæтты алыхуызон секцитæ æмæ къордтæ. Тагъд рæстæджы культурон хæдзар байдзаг уыдзæн хъæлдзæг хъæлæстæй, зарджытæй.  Ам гуырдзысты сфæлдыстадон хъуыдытæ, рæздзысты дзы ног курдиаттæ. Культурæйы хæдзар æппæт хъæуы цæрджытæн сæ уарзондæр бынат кæй æсуыдзæн, уый гуырысхойаг  нæу. Уæ ног культурон хæдзарæн мæ зæрдæ зæгъы сфæлдыстадон хъæздыгдзинад æмæ æнтысджын куыст, — загъта Битарты Вячеслав, стæй Фрайты Сослан æмæ хъæубæсты кæстæртимæ алыг кодтой сырх лент.

Хъæубæсты цæрджыты номæй Чыпыраты Ирбег бузныг загъта нæ бæстæйы Президент Владимир Путинæн, Битарты Вячеславæн, районы разамындæн æмæ, бæстыхай чи сарæзта, уыцы хъазуатон кусджытæн.

Бæрæгбон срæсугъд кодтой номдзыд зарæггæнджытæ æмæ сфæлдыстадон къордтæ.

Ног Бæтæхъойыхъæуы Культурæйы артдзæст арæзт у ныры рæстæджы домæнтæм гæсгæ, ис дзы концертон зал 300 æрбадæн бынатимæ, кæсæн зал, грим æвæрыны æмæ дарæсæфснайыны уаттытæ.

ОСТАВЬТЕ ОТВЕТ

Please enter your comment!
Please enter your name here